LONGIDO YAPATA MGAO WA CHAKULA MASHULENI KUKABILIANA NA JANGA LA NJAA.

Posted on: July 10th, 2023

Mkuu wa wilaya ya Longido Mheshimiwa Marco Henry Ng'umbi leo tarehe 10/07/2023, amepokea mradi wa chakula toka Shirika la World Vision kwa ajili ya shule za msingi 30 zilizopo katika kata ya Ketumbeine ambazo zina zaidi ya wanafunzi 11,726.

Akikabidhi chakula hicho, Mratibu wa world Vision kata ya Ketumbeine Ndugu Peruth Daudi kwa shule hizo 30 za msingi, World Vision imetoa jumla ya gunia 1140 za  Mahindi, Gunia 281 za Maharagwe pamoja na Ndoo  274 za Mafuta ya kupikia zenye ujazo wa lita 20 ambavyo vimegharimu takribani  Shilingi Milion 175 za kitanzania.

Mheshimiwa mkuu wa wilaya amelishukuru shirika la world Vision kwa kuona sababu ya kutoa msaada huo wa chakula kwa watoto wa shule za Msingi katika Wilaya yake "Nimepita nimeona chakula mashuleni, kama tunavyojua uwepo wa chakula mashuleni kunaongeza chachu ya wanafunzi katika kujifunza".Alisema mheshimiwa Ng'umbi.

Serikali inatambua mchango wa wadau na mashirika mbalimbali kwenye elimu, hivyo basi inaunga mkono jitihada za Shirika la World  Vision kwenye kusaidia wanafunzi haswa wa shule za msingi.

Mheshimiwa mkuu wa wilaya amelipongeza shirika la World Vision kwa kutimiza Afua za lishe kwa wanafunzi "Kwa kuwa watoto  wanakula shuleni  wote tumeona wamependeza na wana afya njema" aliongeza Mkuu wa wilaya.

Naye Ndugu  Grace Mghase kwa niaba ya mkurugenzi wa Halmashauri ya wilaya ya Longido amewaasa shule zilizonufaika na chakula hicho kukitumia kwa manufaa ya walengwa na si vinginevyo. Kwa kufanya hivyo kunarahisisha matumizi ya bajeti ya chakula kwa muda mrefu, na amewaasa wazazi kutojibweteka katika uchangiaji wa chakula mashuleni.

Shirika la World vision limekuwa likifanya vizuri  kwenye maendeleo haswa ya  chakula mashuleni kwenye wilaya ya longido haswa kata ya Ketumbeine.

JAMUHURI YA MUUNGANO WA TANZANIA  KAZI IENDELEE